CHANGAMOTO YA VIKOBA

		Mfumo wa Benki ya Wananchi wa Vijijini (Vicoba), Wilaya ya Moshi mkoani Kilimanjaro unakabiliwa na changamoto za ukosefu wa mitaji na kusabaisha wanachama wake kuwa maskini. Mkurugenzi na Mwezeshaji wa Taasisi inayosimamia mfumo wa Vicoba ya Nyote, Wilaya za Manispaa ya Moshi na Moshi Vijijini, Erasimo Njafula alisema hayo jana kwenye mkutano uliofanyika katika Kata ya Njiapanda. Alisema baadhi ya wanachama siyo waaminifu kwani hushindwa kurejesha fedha walizokopeshwa kwa ajili ya kuendeshea miradi yao, hali inayokwamisha wanachama wengine wasipate mikopo kwa wakati. Alisema mfumo huo kwa Mkoa wa Kilimanjaro, ulianza mwaka 2007, hivyo changamoto zilizopo zinasababisha wanavikundi kurudi kwenye hali ya umaskini. Baadhi ya wanavicoba wa Vunjo, walitaka ahadi ya fedha iliyotolewa na Rais John Magufuli kwenye vikundi vya vikoba ambavyo vimesajiliwa, itekelezwe. Akiwa katika mkutano wa kampeni mwezi uliopita uliofanyika Uwanja wa Mashujaa Manispaa ya Moshi, Rais Magufuli aliahidi kuwa iwapo atachaguliwa atahakikisha anatoa Sh50 milioni kwa kila kata ili ziweze kusaidia wananchi kujikwamua na umaskini.  Mwanachama wa Kikundi cha Vicoba cha Tupendane, Eskari Ndossy aliitaka Serikali itenge fedha kwa ajili ya kusaidia vikundi hivyo. Hadi sasa Manispaa ya Moshi ina vicoba 118 vilivyounganisha rasilimali zao kwa kuchangiana, hivyo kubuni miradi ya maendeleo ikiwamo ya upishi,biashara ya matunda, nguo, viatu vya mitumba na usafirishaji wa abiria na mizigo kwa kutumia bodaboda na bajaji